Установите Flash player для полного просмотра сайта!
  Эсас Тарих Репертуар Труппа Хаберлер Фестиваллер Макъалелер Галерея Контактлар Официальные документы  
 
Установите Flash player для полного просмотра сайта!
Установите Flash player для полного просмотра сайта!

КРЫМСКИЙ КОВЧЕГ

"САНАДА КЪАЙНАНА-КЕЛИН МАДЖЕРАЛАРЫ"- "Янъы дюнья" №28(1410) 2017 с., июль 21

Дата добавления: 2017-07-21

Просмотров: 72

"САНАДА КЪАЙНАНА-КЕЛИН

МАДЖЕРАЛАРЫ"  

"Янъы дюнья"№28(1410) 2017 с., июль 21

      Къайнана ве келин арасындаки мунасебет мевзусы  севги мевзусындан сонъ эбедий муаммалардан бирисидир. Халкъ агъыз яратыджылыгъында баягъы бир ер туткъан бу мунасебетлер акъкъында нидже-нидже комедиялар язылды, нидже фильмлер яратылып, нидже спектакллер къоюлды. Буларнынъ арасында азербайджанлы драматург Меджид Шамхаловнынъ «Къайнана» пьесасы боюнджа  1978 сенеси «Азербайджанфильм» киностудиясында Гусейн Сеидзаде  чыкъаргъан ве бир кереден миллионларнен чешит тилли сейирджилернинъ севгисини къазангъан  «Къайнана» фильмини айрыджа къайд этмек мумкюн.

             Июль 18 куню бу мешур пьесанынъ къараманлары къырымтатар тилинде лаф эттилер. Къырымтатар миллий театримизнинъ баш режиссёры Ринат Бекташев азербайджанлы эдипнинъ пъесасы эсасында «Алтын келин» азырлагъан спектаклини сейирджилерге такъдим этти.  Асылзаделер несилинден олгъан къайнана Дженнет ханым(Луиза Усеинова) сырадан бир тенекеджининъ къызы олгъан, паралы бир зенаат саиби олгъанына бакъмадан пара къазанмагъа бильмеген тиш экими олып чалышкъан  келини Севданы ич къабул этип оламай. Заваллы къадыннынъ къайнанасына корюнмек ичюн япкъан эр анги арекети файдасыз, Дженнет ханым келинининъ эр бир ишинде мин тапа. Бегенмей весселям! Чаресини тапалмагъан Севда(Нияра Менжитова)  эвден кетмек къарарына келе.  Къоджасы Азиз(Ильяс Абдукъадыров) анасы ве къарысыны барыштырып оламай, фурсат таптымы эвден зувмагъа тырыша. Яш къоранта бозулув телюкесинде. Вазиетни тюзетмеге Азизнинъ досту Меджит (Марлен Османов) нишанлысынынъ ярдымында кирише. Динсизнинъ акъкъындан имансыз келир дегенлери киби Дженнет ханым киби джадыларнынъ акъкъындан табиий ки тыпкъы онъа бенъзеген яш джады келебилир. Ойле де ола. Севда кете ве онынъ ерине джемидан ве  йылтыравукъ къутуларнен юкленип, ана-бабасы  санки Тюркиеде къуюмджылыкънен огърашкъан, алтын тюкян саиплерининъ къызы Мумине(Лемара Джелилова) келе. «Янъы келин»  сабадан акъшамгъадже там манада копечигини сувара, беден гимнастикасынен огъраша,  роллерине азырлана, булардан бош вакъыт тапкъанда исе тюкянларгъа  «жопингге», ректоранларгъа эгленмеге кете.  Севда киби къайнанасына саба шериф тилеп къаве пиширмек о якъта турсын, саба къавалтысыны  къарт къадынгъа азырлатмакътан арланмай. Даа тюневин укюмдар, эр бир сёзюни ферман дие къабул эттирген  джады къайнана тили курмекленген, къоркъудан агъламсырагъан муляйим къартийге чевириле. Севданынъ къадири пек билине. Мегер, келини мелек экен мелек. Энди оны къайтармакъны тюшюне. 

          Эм режиссёр, эм театримизнинъ истидатлы актёрлары спектакльге миллий рух берип, оны бизим шараитимизге якъынлаштырмагъа тырышып,  премьера куню рыкъма-рыкъ залнынъ гурьдели эльчырпмаларыны къазандылар. Темаша девамында Луиза Усеинованынъ Дженнет ханымында бир чокъ къадынлар озь къайнаналарыны таныдылар: «Ах, бу Дженнет ханымны кимгедир пек ошатам амма...».  Театр омюрден алынгъан вакъиаларны саналаштырып миллетни тербиелемек, юдже маневий дегерликлерни ашламакъ, эйиликке чагъырмакъ вазифесини беджергени белли эбет. Нидже-нидже къоранталарнынъ тынчлыгъыны бозгъан, пек чокъ балаларны бабасыз, огълуны куньлегенинден, онынъ ляйыгъы бу дюньягъа даа кельмегенинде эмин къайнаналар халкъымыз арасында да аз дегиль.  Десене, оларнынъ тек огълуна дегиль де, келинине де акъикъий ана олмасы ичюн «Алтын келин» спектаклиндеки Муминелер керекми?  Умют этемиз ки, керек олмаз. Спектакльни сейир эткен сонъ озьлери ичюн тек къайнаналар дегиль де, ярын къайнана оладжакъ келинлер де догъру хуляса чыкъарырлар.

              Зера БЕКИРОВА


Установите Flash player для полного просмотра сайта!

04 сентября 2017 г. в 18:30


07 сентября 2017 г. в 18:30


12 сентября 2017 г. в 18:30